【何麒的生活隨筆】
何麒：淺談EDC（一）
大家好，我係何麒，我係Happy Kongner 入面其中一個創作人。我諗大家就算冇睇過都一定有聽過我個節目《字得其樂》，嗰個節目我會講下關於鋼筆同埋西洋書法嘅野。
而呢一個專欄叫做「何麒的生活隨筆」，我會喺度分享下我嘅一啲無喺片入面講嘅興趣同埋一啲生活小習慣。我地要好好咁生活，先至有力量去做我地想做嘅野㗎嘛係咪？而今次我想分享下一樣係外國網上社群好興，但香港好少人討論嘅一個潮流，就係EDC。
EDC即係Everyday Carry，即係你每日返工返學嘅時候你會袋住嘅野，方便你應付日常工作，甚至有機會可以幫到你應對突發嘅情況。外國近年就好興呢樣野，但香港我地就好少討論。其實唔使去到外國咁樣，刀，萬用鉗嗰啲先計，其實我哋平時跟身嘅手錶，銀包，電話，鎖匙，耳機呢啲已經係。其實花少少心機整理好自己行裝，出街同返工都方便啲啦係咪?
喺香港地，好多人出街都好輕便，可能連袋都冇個就會出去，所以大家要入坑玩EDC工具就最好要揀過度過，盡量揀啲有特定功能其他野取代唔到嘅工具。例如話電筒咁，有時如果返工要落地牢又或者做啲簡單檢查嘅話，有枝電筒喺身真係方便好多。你可能覺得電話嘅閃光燈都有盞燈仔，但電筒有專業嘅LED發光晶片，用起上嚟會好過用電話閃光燈照，而且唔使用到電話嘅電。因此好多人嘅EDC loadout，都會隨身攜帶一枝電筒係身。
咁點解要提EDC呢？外國EDC嘅社群又會玩啲咩呢？ 我哋就留返下次再講啦。
（本欄逢周三更新。敬希讀者垂注）
Search